點解僭建? 點解咁夠薑僭建? 一分拆解香港朁建風波
近日紅山半島74號屋單嘢，真係將香港「僭建文化」嘅荒謬推到去一個新高度。黑雨一落，沖走咗山泥，亦都沖走咗呢班權貴嘅遮醜布。一間價值幾千萬甚至過億嘅豪宅，竟然可以「偷薄」個山坡去挖地牢、霸官地，呢種大膽程度，簡直係視法治如無物。抑或係,..幫佢做嗰間承建商「唔知咁係犯法」?
究竟係乜嘢原因，令到呢班人咁夠薑？
豪宅區：唔係「夠惡」，係「博你唔敢郁」
業主公司雖然啱啱被判罪成，但大家要睇清楚，呢啲僭建係喺2009年開始搞，足足瞞咗十幾年接近廿年。點解廿年前既佢哋已經咁夠薑？
私隱變成擋箭牌： 呢類高級私人屋苑，保安森嚴到連隻蚊飛入去都要登記，屋宇署、地政署嘅人平時根本好難入去巡查。只要業主唔開門，官方程序要攞手令，入屋難上加難。呢種「圍牆保護」，就係佢哋僭建嘅最強後盾。
財力與法律戰： 對於呢啲業主嚟講，錢唔係問題，錢不嬲都只係窮人嘅問題，嗰Ｄ所謂罰款，對呢班人嚟講根本就係「碎銀」。佢哋請得起律師，可以將一個清拆令拖得就拖，用法律程序去消磨政府嘅行政效率。對佢哋嚟講，僭建多咗出嚟嗰幾千呎空間嘅價值太吸引，以生意角度嚟講，點計都係贏。
由村屋到舊樓：僭建係「香港特色」？
除咗紅山半島，元朗嘅村屋加建一層、市區唐樓天台屋、平台屋、舊樓露台改裝，香港可以話係無處不僭建。形成呢種僭建文化原因各有不同：
元朗村屋嘅「宗族力量」： 喺新界，好多村屋僭建係「集體行為」。你起我又起，政府如果入村執法，往往會遇到強大嘅阻力。呢種「法不責眾」嘅心理，加上地政部門對鄉郊土地管理嘅某種「彈性」，令到村屋僭建變成咗公然嘅秘密。
市區舊樓嘅「生存空間」： 市區嘅僭建（如劏房、天台屋、平台屋）好多時係因為居住空間不足。政府喺處理呢類問題時，往往要考慮到安置同社會矛盾，結果又變成「隻眼開隻眼閉」。
係政府係咪「投鼠忌器」？
講到呢度，大家一定會問：政府呢？係咪無能？
老實講，香港嘅建築法例係好嚴，但執行力係另一回事。唔好講僭建，就算係政府部門處理單位漏水時，都會出現一種「緩慢」既節奏，係人手不足？抑或有難言之隱？。針對普通小市民嘅違規，你可能好快就會收到傳票或者罰單；但面對紅山半島呢類牽涉到社會名流、甚至係政經權貴嘅地段，又或者元朗鄉紳嘅團結，程序往往變得異常「細緻」同「謹慎」。
你可以話係行政程序繁複，亦可以歸咎為部門之間權責不清，總之係講得通。但睇喺市民眼入面，呢種「你有你執法，佢有佢僭建」嘅長期並存，難免令人質疑：係咪只要有錢有勢，就可以喺法治社會入面攞盡好處？
真相只有一個
紅山半島事件只係冰山一角。呢場風波拆解出嚟嘅真相係：香港嘅僭建問題，已經係香港嘅毒瘤，唔去根治，只有等待癌變。如果繼續等有黑雨沖走山泥先去執法，咁香港永遠都只係一個外表光鮮嘅「僭建之都」。當法治嘅震懾力可以畀錢解決，或者可以靠關係拖延，呢個先至係香港最危險嘅崩塌。當香港人均居所樓面面積中位數只係 172 平方呎嘅時候，係咪都要為奉公守法既市民平反一下？
[以上內容純屬作者個人意見，並不代表本站立場。]