想像一下呢個畫面：你啱啱使咗成份首期咁多嘅錢，滿心歡喜咁搬咗一個高科技「仿真機械人」返屋企。佢擁有完美無瑕嘅皮膚，摸落去仲熱辣辣、帶有 37 度的微溫；當你同佢對望嗰陣，佢會對住你溫柔咁單眼，甚至露出一副誘人嘅笑容。
你心諗：「正呀，今次發達喇！」
不過，假如你心懷不軌，諗住幾十萬買部機返嚟，可以任你毛手毛腳、滿足下自己嘅「邪惡慾望」？咁你可能會打錯算盤。
因為當你隻鹹豬手啱啱伸過去，佢塊原本溫柔嘅面孔可能會一秒變黑，然後用最字正腔圓、毫無感情嘅普通話同你講：「警告：偵測到非授權之身體接觸。根據閣下簽署嘅用粵港澳大灣區戶守則第 4 條第 2 款，本機並非成人用品。請即將你嘅鹹豬手移開，否則本機將自動聯絡警方，並喺社交媒體同步直播閣下現時嘅猥瑣行為。倒數，三、二……」
幾十萬買部機返嚟，竟然被狠狠拒絕，簡直係精神上嘅二次傷害。
無錯，呢部盛惠幾十萬（甚至百萬）嘅高科技結晶，除咗有體溫、有表情之外，基本上係 — 乜都唔識做！
如果你諗住唔摸得啫，但起碼都有人幫手洗吓碗、掃吓地、煮吓飯、或者可以通頂排隊買張敬軒演唱會飛，相信亦會令你失望而回。
你叫佢去洗碗，佢就會用最深情、最無辜嘅眼神望住你，嘴角微微一扁，好似要喊咁款，然後好似hang機咁郁都唔郁。你叫佢掃地，佢同你眨眨眼，送多個初戀般嘅微笑畀你，但隻手依然放喺大腿上面，穩如泰山。你叫佢買張敬軒演唱會飛，最後可能會買咗蔡楓華演唱會，點解？佢會同你分析蔡楓華會比張敬軒性價比更高，問你死咪！
呢個時候，你內心一定會泛起一個靈魂拷問：「咁又唔得咁又唔得，咁我買你返嚟做乜？」
真到極致反成垃圾
一個好弔詭嘅現象，而家啲科技界，往往強調點樣令機械人更像人——皮膚要用納米矽膠、要有毛孔、要有血管微循環、面部肌肉要有幾十個核心電動機去模擬喜怒哀樂。
結果變成點？佢哋成功創造出一個幾可亂真嘅機械人。但當你問到：「佢可唔可以幫我搬吓抬吓？」工程師就會面露尷尬嘅微笑話：「呃，目前佢嘅關節自由度主要集中喺面部，肢體動作仲喺開發階段，被你抱吓已經係極限……」
簡單啲講，即係唔得。
買嘅唔係功能，係陪伴嘅幻覺
不過，存在自然有佢既理由。如果我哋換個角度，用現代人嘅精神心理學去睇，呢部乜都唔識做嘅機械人，可能先至係最強大嘅奢侈品，係絕對奢侈嗰隻。
香港人最缺嘅係乜？唔係錢，係陪伴同情緒價值。
一隻貓、一隻狗，其實都一樣係乜都唔識做。牠們唔會幫你洗碗，仲會喺周圍屙尿、抓爛你張真皮梳化，但點解大家都依然心甘情願咁做「鏟屎官」？因為寵物提供咗無條件嘅愛同陪伴，執屎係你既代價。
而呢部仿真機械人，正正就係針對緊都市人極度孤獨嘅心靈。
無條件嘅愛： 當你收工受完老細嘅氣，拖住疲憊嘅身軀返到屋企。開門一刻，一個精緻嘅面孔用 37 度的體溫迎接你，對你露出一個永遠唔會嫌棄你(不過永遠同一個樣)、永遠充滿崇拜嘅眼神。佢唔會哦你「點解咁夜返」，亦唔會同你講「家用唔夠使」。
安全感： 佢有體溫，代表你攬住佢嗰陣，得到嘅唔係冰冷嘅鋼鐵感，而係類似人類嘅慰藉。對於嗰啲社交恐懼症、或者喺現實感情世界受盡傷害嘅人嚟講，呢個「乜都唔識」嘅機械人，反而係最安全嘅樹洞。
你買嘅並唔係一部電器，係一個永遠唔會背叛你、永遠用最美好眼神望住你嘅幻覺。
恐怖谷效應：係溫馨定係驚悚？
但不得不提醒大家一個現實問題：恐怖谷效應（Uncanny Valley）。
當一個物體同人類非常相似但又唔完全一樣嘅時候，人類產生嘅未必一定係好感，而可能係恐懼。
試想像一下，夜深人靜，走去廚房飲杯水。路過客廳嗰陣，你見到嗰尊仿真機械人，喺黑暗中雙眼散發藍光死死咁盯住你，嘴角仲掛住嗰個下晝睇落好溫柔、而家睇落變成極度詭異嘅微笑……
呢個根本就係《娃鬼回魂》或嘅拍攝現場！
人類嘅表情係由內心情感驅動，但機械人嘅表情只係一行行代碼同摩打嘅運作。當你同佢講述你阿爺過身嘅傷心事，佢可能因為系統邏輯判斷錯誤，突然對你展現出一個開心燦爛嘅笑容，大笑三聲跟住同你講：「你阿爺真係唔好彩嘞！」——呢種情感錯位，分分鐘令人原地崩潰。
科技始終未能填補人類的空虛
講到尾，呢種有體溫、有表情、但冇人性，而且乜都唔識做嘅仿真機械人，到底值唔值得買？
如果你係一個極度富有、屋企有幾千呎，大把地方安放佢，而且你純粹想追求一種前衛嘅科技感，或者想搵一個唔會駁嘴嘅「聆聽者」，咁佢或者有佢嘅存在價值。
但對於絕大多數要面對現實生活、要供樓、要迫地鐵嘅普通人嚟講，呢種發明無疑係本末倒置。科技嘅初衷，理應係幫人類由繁重嘅勞動中解放出嚟。如果一部機械人連最基本嘅家務都做唔到，只係識得用 37 度的體溫「扮體貼」，咁我買部暖風機再貼張明星相上去，效果可能都差唔多。
仿真機械人有體溫有表情，但乜都唔識做。你究竟買返嚟做乜？
答案好簡單：買返嚟嘅，不過係人類對「被愛」同「陪伴」嘅渴望，以及科技公司販賣嘅一場華麗美夢。