世界病咗，但食藥嘅卻必須係我
喺呢個充滿正能量、人人講狼性同自我實現嘅偉大時代，社會好貼心咁為依家班後生仔引進咗一個好高尚嘅現代名詞——尼特族（NEET）。
「尼特」呢個名聽落不僅優雅，佢仲成功撕走咗以前雙失青年、社會寄生蟲呢啲咁粗鄙嘅標籤，用現代管理學嘅冰冷邏輯，精準咁定義咗一班冇升學、冇就業、冇進修嘅人類。喺主流社會嘅成功學專家眼中，尼特族就係一班喺溫室入面腐爛嘅草莓，係一班拒絕為社會呢部大機器提供齒輪潤滑油嘅叛徒。
但大家有冇諗過，呢件事可能係一場被嚴重低估嘅集體行為藝術？就好似當人人抬起個頭望住個天嗰陣，就算你只係咁岩行過，你都會不期然有相同既行為出現一樣。
完美社會嘅「不完美零件」
我哋必須要衷心讚美呢個時代。好幸運，我哋活喺一個比工業革命時期更輝煌百倍既大時代，樓價同仙境看齊、通脹同火箭賽跑，但份糧就好似得咗重度侏儒症、永遠長唔大嘅美好世界。
喺標準嘅社會劇本入面，一個優秀嘅生力軍，應該要喺二十幾歲條命最精壯嘅時候，一邊攞住啱啱夠交租同食兩餐公仔麵嘅人工，一邊每日喺辦公室體驗長達 12 小時、人生必經嘅加班生活。跟住孭起要供你二三十年嘅樓按，買一間以為可以遮風擋雨、點知原來係有機會未供完你就會面對金融海嘯而失業被銀行 call loan 既商品，大半生向地產商獻祭，最後喺退休前夕，帶住滿身職業病同乾枯嘅銀行戶口，安詳咁感謝社會對佢嘅栽培。
呢個就係我哋目前完美社會嘅閉環！
偏偏就係有啲後生仔嘅腦袋壞咗。佢哋喺某個加班到凌晨三點、喺提款機撳錢、睇見自己存款少得可憐嘅時候，突然間心算咗一條數學題：「如果我條命努力嘅終點，係連一間廁所都買唔起，咁點解我唔一開始就瞓喺廁所入面就算？」
於是，尼特族誕生。
佢哋發現，只要切斷對物慾嘅執著，每日食住老竇老母嘅隔夜餸，佢哋嘅生存成本居然可以降到接近微生物嘅水平。佢哋用「唔入場、唔參賽」嘅姿態，向呢個完美嘅經濟體系作出無聲抗議，為自己嘅人生投下一張廢票，但佢地心安理得，可以了無牽掛咁生活。
其實係咪你唔夠努力？
無可否認社會係具有高度智慧嘅。當一個體制出現問題，社會嘅解決方法，往往唔係解決問題本身，因為成本實在太高嘞。我哋只需要將問題換一個角度去諗，成個世界即刻變返和諧美滿：
當樓價高到要不吃不喝八十年才買得起嘅時候……
「邊個叫你日日飲珍珠奶茶、去日本旅行？」
當初級職位全部被 AI 吞噬，畢業生一出校門就面臨「畢業即失業」嘅時候……
「係你缺乏競爭力、冇與時俱進，關人隱事呀！」
當工作壓力大到令人集體抑鬱、焦慮症爆發嘅時候……
「依家班後生仔，哎，心理質素太差，心靈脆弱到豆腐咁。」
呢個就係我哋社會完美咁解決呢個問題嘅方法。只要將尼特族嘅形成，歸咎於「呢代人太懶、太自私、抗壓性低」，社會各大巨頭就可以繼續喺冷氣房入面開會，研究點樣進一步榨乾啲勞動力。呢個操作就好似一間工廠排咗幾十年有毒廢水，搞到附近居民集體中毒，工廠老闆仲要企喺台上面痛斥班居民：「你哋點解唔自備防毒面具？你哋身體咁差就去健身啦！Ｄ免疫系統差到簡直係人類嘅恥辱！」
尼特族一下子由問題變咗做最完美嘅解決方案。只要佢哋被貼上「個人失敗者」嘅標籤，用嚟掩蓋教育體制嘅集體失能、職場文化嘅病態剝削，同埋階級固化嘅殘酷現實，只要再加返Ｄ幫佢哋提供底薪重返職場既工作、或者比埋錢佢去學 AI 等 AI 教佢做野，咁樣我哋生活中嘅社會仍然係完美無瑕嘅。
繁衍「奴隸」嘅最後一聲嘆息
最諷刺嘅係，社會一邊痛罵尼特族係社會負擔，一邊又瘋狂咁焦慮人口老化同無人肯生兒育女。
「你哋呢代人不結婚、不生子、不買房，社會點進步？」
一個連活人都考慮要唔要集體休眠嘅社會，居然仲催促佢哋繁衍下一代？想佢哋繼續喺廿年後成為新一代嘅尼特族精英階層？
有人生而想成為律師、醫師、會計師，但尼特族與別不同，佢哋唔係要成為死屍，亦唔係「唔想生活」，佢哋只係唔想過嗰種「現代成功人仕」嘅精緻生活，因為喺現實社會嘅天秤之下，佢哋的確並不成功。喺全社會都裝瘋賣傻、將扭曲嘅價值觀奉為金科玉律嘅時代，呢班喱喺屋企嘅隱蔽青年，用一種近乎荒謬嘅自殘方式，去做出適合自己嘅選擇。
佢哋咁做有錯咩？
所以，下次當你喺條街度，見到那些面容枯槁、眼神死寂、正趕住去打卡迎來另一個 12 小時高壓工作嘅「社會精英」時，請給予佢哋最崇高嘅敬意，因為係佢哋支撐住呢個社會既進步；但同時，亦都請唔好太過苛責嗰Ｄ瞓喺屋企、望住天花板發呆嘅尼特族。
因為喺一個大家都以為自己正常嘅世界入面，倒後行嘅人，往往睇落最似瘋子。