最近D社交媒體，真係睇到人心都涼埋。大家有無留意嗰單新聞，有個港大 IT 碩士，有 10 年經驗，點知失業咗 11 個月，最後竟然轉行去送外賣同做保安。佢仲自嘲話嗰張碩士證書其實無乜用。睇到呢度，相信唔少打工仔都心頭一震：連呢啲讀咁多書嘅天之驕子都攪成咁，我哋呢大學門口都未入過嘅會變成點？
呢個唔係個別例子，而係反映緊依家香港職場一個好殘酷嘅現實：個市真係好差。再加上 AI 浪潮，直頭係「雪上加霜」。前排仲有成 200 幾個經濟同 AI 專家簽名聯署，叫大家正視 AI 對就業嘅衝擊。大佬，連專家都出聲話驚，我哋D平民百姓點算？
點解依家咁難搵工？
其實唔使專家講，大家都Feel到。依家搵工，好多時都係鬥平或者鬥快。你見有人月薪 12 萬，做到變6 天工作叫苦連天；另一邊廂又有職位開價萬二蚊，點生存？依家啲老闆，個個都想搵個十項全能：要識寫 Code、識玩 AI、Social Media、要識做 Sales、仲要平。加上 AI 工具普及，好多初階、重複性高嘅工作（例如簡單data entry、翻譯、甚至係 coding），AI 一秒鐘就搞掂，公司仲點解要請個唔熟手嘅新人？
唔想變AI 時代嘅犧牲品，可以點做？
大家唔好太過灰，因為恐慌除咗令你訓唔著同荷爾蒙失調之外，對搵工一啲幫助都無。不如轉個角度，睇下點樣可以喺呢個 AI 洪潮中掙扎求存：
擁抱AI ：你先要理解，唔係 AI 取代你，其實係用 AI 嘅人取代你
你依家仲用緊傳統方式做嘢，當然係慢。試下將 AI 當成你自己條team。寫文？叫 ChatGPT 幫你搵大綱；整表？叫 AI 教你複雜嘅 Excel 公式。甚至乎你自己唔識做嘅嘢，你都可以叫AI去做，只要你識得叫 AI 去做嘢，你嘅效率就係人哋嘅 10 倍。記住，AI 只係工具，佢仲未強到有意識知道你需要乜野，而係需要一個有腦嘅人去話比佢知佢要做Ｄ乜。
人情味：AI 最難取代嘅嘢
無論 AI 再點勁，佢都無人情味。乜野係人情味？講緊嘅係創意、同理心、複雜嘅人際溝通、危機處理，呢啲係 AI 幾乎係冇可能搞得掂嘅嘢。如果你做緊嗰行係純粹機械式工作，咁就要諗下點樣將自己嘅技能轉型，加啲人文素養落去。例如做 CS，AI 可以答問題，但要處理客人嗰種火都嚟埋嘅情緒， AI 往往係火上加油，總係需要人去安撫嘅。
唔好睇輕轉型嘅勇氣
就好似嗰位 IT 男咁，失業 11 個月，心態真係好難唔崩潰。但如果你嘅行業真係已經夕陽，或者被 AI 取代咗大半，咁必需面對現實，死守真係無用。但轉型唔代表你要由頭學起，你可以係疊加技能。例如你本身做開寫code, 可以考慮吓轉去做 Software Sales and Marketing，將你原本嘅專業融入職業，你就擁有疊加價值。
降低期望值，唔代表喪失自己嘅價值
市道差，搵份比之前低人工嘅工返住先，絕對唔係乜野羞恥嘅事。依家講嘅係求生，唔係講理想。有工返，至少有糧出，有錢交租食飯，呢個係生存基石。你唔好諗住入500強企業由低做起呢種不切實際嘅期望，500強都只係得500間，其實你有冇諗過，香港有十萬中小企，好多其實環境不比你好，佢哋跟本比唔起錢請到好似你咁嘅人材，就因為冇人材，限制咗公司嘅進步，影響競爭力。你嘅價值，就係可以幫呢Ｄ中小企突圍，當然，佢哋絕對比唔到你想要嘅人工，但問題係，你依家根本冇糧出嘛大佬！如果可以搵返份又可以發揮自己所長，又可以繼續坐喺寫字樓涼冷氣嘅工，只係人工少Ｄ，點都應該比去做 12 小時嘅保安好掛。呢種降維打擊，你係絕對有機會遇上欣賞你嘅伯樂，不過首先你要做嘅，唔係話比人知你有幾勁，而係帶住一份謙虛嘅誠意同對方溝通，坦白話比人知你嘅處境，同時你可以為公司帶嚟嘅實質改變，唔好再用嗰D CV template，唔好再遮遮掩掩自己唔完美嘅履歷，記住要帶真誠呢位兄弟去面試。
心態決定境界
講真，呢個年代，無人可以擔保你一份工做到退休。個市好唔好，我哋控制唔到；AI 發展快唔快，我哋更加控制唔到。我哋唯一控制到嘅，就係自己嘅心態。
失業？心灰意冷？絕對理解，但休息完記得起身。你未必要將嗰張你認為無乜用嘅證書收埋，但必需將腦入面嘅知識激活。呢個時代，係一個鬥進化，唔係鬥死守嘅時代。共勉之！