喺呢個年代，「裸辭」呢兩個字，講出口果陣好似好型、好有骨氣、好有追求自由嘅瀟灑。但喺今時今日嘅香港，老實講，如果冇返咁上下家底，你嗌「老子唔撈」之前，你真係要捫心自問：你，到底夠唔夠薑？
呢幾年見證住香港經濟嘅轉型同高低起跌。坦白講，現時嘅就業市場同幾年前已經大不同。樓市波動、零售餐飲大洗牌、金融同科技業緊縮，唔少企業唔係裁員就係凍結人手。以往東家唔打打西家、三個月內搵到下一份工嘅黃金時代已經過去，求職已經變咗做馬拉松長跑。喺呢個大環境之下裸辭，可能唔再係單純嘅休息一下咁簡單，分分鐘變咗一場悠長假期都未定。
現實Ｄ講，裸辭帶嚟嘅問題，基本有以下三種：
第一：儲蓄存款蒸發
裸辭後，第一個打醒你嘅唔係理想，係月結單。
香港嘅生存成本有幾高，大家都心知肚明。就算你唔係餐餐大魚大肉、唔買名牌，只要你一擘大眼，供樓或者租金、水電煤、網費、交通费，全部都係錢。平時有糧出有現金流，呢啲叫固定開支；當你收入斷咗，呢啲就變成無底深潭。
「第一個月仲覺得好爽，去旅行、瞓到自然醒；第二個月開始唔敢約朋友食飯；第三個月，連去便利店買包卡樂B都要猶豫。」
呢段獨白，係一個半年前裸辭嘅 30 歲行sale屎同我講嘅心聲。當戶口嘅數字越嚟越少嗰陣，嗰種末日倒數嘅感覺就越嚟越濃烈，甚至比上司催你交功課更令人窒息。
第二：無形嘅心理毒素：失業焦慮
經濟壓力固然致命，但更難耐嘅，係心理上嘅折磨。
香港人嘅身份認同，往往同工作綁定。去親聚會，第一句通常係「最近忙咩呀？」。當你裸辭咗一段時間，你就會開始唔敢出席朋友聚會，怕被問起近況，怕見到身邊人步步高陞，而自己就好似一潭死水。雖然話唔應該同人比較，人比人比死人，但係又有邊個做得到？
初初裸辭，你以為自己重獲自由；但過咗蜜月期之後，自由就會變成孤立。每日打開求職網站，寄出幾十封 Resume 卻石沉大海，或者面試後等冇回音。嗰種被市場淘汰嘅挫敗感，會日夜侵蝕你嘅自尊、自信。好多人以為裸辭係為咗拯救心理健康，殊不知冇咗安全網嘅裸辭，往往會將人推向另一種更深嘅焦慮。
第三：履歷表上嘅空白期
好啦，當你收拾心情，決定重返江湖，現實通常會踩多一腳你。
香港嘅 HR 對 Resume 上嘅空白期相當敏感。即使你解釋係想給自己一個 Pause、去體驗生活，喺香港呢個效率至上嘅社會，HR或者僱主依然會諗：「呢條友係咪上一份工有問題被逼走？」或者「佢係咪工作能力唔夠好先至搵咁耐工？」
更大獲嘅係傾人工嗰陣出現。當你係「有工喺身」去面試，你有本錢同對方拉鋸；但當你已經裸辭咗半年，口袋告急，HR 好容易睇穿你嘅弱勢。結果，你可能要被迫接受一份薪水比之前更低、甚至職位降級嘅 Offer。到頭來，當初為咗逃避工作痛苦而裸辭，最終卻換來一個更痛苦嘅經歷。
瀟灑有價，切忌衝動
呢篇文章並唔係想一棍打死所有想裸辭嘅人，如果你覺得現時嘅工作已經極度嚴重影響你嘅身心健康，或者職場環境充滿毒素，離開絕對係一種自我保護。但喺現時嘅香港經濟氣候下，我哋係咪應該有策略地辭，而唔係裸辭？
好多人裸辭，講白Ｄ，其實係心態唔夠強，佢喺工作環境中往往出現負面情緒，覺得自己被欺壓，上司唔理解，同事唔受歡迎，客戶難服侍，所以出現令人身心疲累嘅情況。查實，你返工為咩？返工唔係為咗結交朋友，返工唔係為咗上司理解，返工唔係為咗令客戶覺得賓至如歸，返工其實最終既目的，只係為咗出糧，你帶咁多私人感情返去，又要人理解，又要人歡迎，自己碰到焦頭爛額！其實你可以參考吓無記電視「男親女愛」入面黃子華嘅角式余樂天，佢嘅口頭襌「又如何？」絕對係你面對工作上種種不平嘅時候所應抱持嘅態度，而佢嘅玩世不恭，亦係你平衡心理問題嘅最佳方法。
如果你真係想裸辭，請先確保自己有至少 6 至 9 個月嘅緊急預備金（甚至更多），並且喺遞信之前，幫自己列出一份詳細嘅裸辭生存計畫書——你打算點樣運用呢段空白期？係考取牌照、學新技能，定係乜都唔做？
瀟灑係需要代價。喺香港呢個殘酷又現實嘅都市裏，最型嘅唔係一氣之下遞信走人，而係就算要走，你都已經做好隨時面對風浪嘅準備。