職場如戰場，點樣喺咁多競爭者入面脫穎而出，成為上司眼中嘅 fit 馬？唔係個個都可以長時間被重用，但總有啲人，無論公司點變、環境點惡劣，張櫈都坐得好穩。究竟佢哋有咩秘訣？唔係單靠運氣或者拍馬屁就攪得掂，真正被上司長期重用嘅人，通常有呢三個共通點。呢啲共通點唔單止適用於香港嘅職場，放諸全球一樣通行。想知你有冇份？即刻睇埋落去！
一）成為解決問題嘅人
職場上，問題多如牛毛，但上司最愛嘅，一定係嗰啲一見問題就即刻著手解決嘅人。呢類人唔會坐喺度等人指示，而係主動分析、拆解，甚至拎出解決方案。根據一項2023年嘅職場調查，超過60%嘅管理者表示，佢哋最重視員工嘅「問題解決能力」，遠超學歷或經驗。呢啲人唔一定係最聰明，但佢哋擅長將複雜嘅事化繁為簡，往往可以比到領導一個清晰嘅方向去將問題解決。
呢類人就好似消防員，無論係deadline壓頂定係客戶投訴，邊度有火頭佢就救邊度，總有方法化險為夷。你有冇試過喺會議上拎出個解決方案？如果有，恭喜你，你已經具備成為消防員嘅條件，唔好返兩日放一日就得嘞！
二）靈活性：適應能力 + 學習能力
世界變得快，人亦變得快，職場如是。被上司重用嘅人，往往有非一般人嘅適應力同學習能力。無論係新科技、新政策，定係公司需要突然轉型，佢哋都能迅速調整。2024年一項由World Economic Forum發佈嘅報告提到，全球職場最渴求嘅技能之一就係靈活性，因為企業喺不確定嘅經濟環境下，更加需要應變能力超強嘅員工。
有啲人一見新野就叫晒救命，但會被重用嘅人，就係嗰啲默默學習、甚至幫隊友上手嘅人。點解？因為上司知道，呢啲人會係公司面對風浪嘅好幫手。你會唔會係一有異動就頭痕嗰種人？定係鍾意學習新事物嘅特種新人類？
三）低調但有影響力嘅「隱形領袖」
唔係每個被重用嘅人都係人都識，佢哋往往有種隱形嘅影響力。呢類人唔一定會喺會議上講得最多，但佢哋嘅建議總係一針見血，具有決定性嘅影響力。佢哋擅長同同事建立信任，幫上司化解內部矛盾，甚至喺關鍵時刻頂住壓力。根據一項2024年嘅職場心理學研究指出，情緒智商 (EQ) 高嘅員工，往往比純粹技術型人才更容易被長期重用。
呢類人就好似幕後軍師，唔出風頭，但每次出聲都言之有物，容易令人信服。佢哋唔單止幫上司分憂，仲會喺團隊中營造出正能量。你有冇試過喺團體中低調出力，最後有人記得你嘅貢獻？
點樣將呢三招練到出神入化？
雖然呢三個特性好似好正，但點樣將佢哋融入日常工作入面？首先，解決問題唔一定要天資聰穎，多 Ｄ 主動了解公司嘅運作，已經係好開始。適應能力方面，不妨主動接觸新事物，例如學吓新技能或者參與跨部門項目，慢慢你會發現自己愈來愈「百搭」。至於影響力，記得真誠待人，多聆聽同事同上司嘅需要，再試吓幫佢哋解決問題，久而久之，自然會有人聽你講野。
職場最忌「hea 住做」，但同樣唔好過分高調積極。真正會被上司重用嘅人，係嗰啲喺關鍵時刻「抵得諗」，又唔會搶功勞嘅隱形英雄，知道未？
要喺職場生存，就要同網友交流更多職場秘訣，想分享你嘅獨門心得？即刻上 nestalk.club 加入討論！