見有人喺呢度寫鬼故, 都好想寫下一個港島東最聳人聽聞嘅都市傳說——東城戲院！
呢個故事係以前一個曾經喺灣仔區住過嘅舊街坊華哥講比我知。雖然東城戲院已經拆卸改建，但呢間老戲院喺老一輩香港人心中留下咗極深嘅陰影。
故事就由一碗沙爹牛肉麵開始。
我當時做緊一個關於香港戲院文化嘅報告，我老豆就叫我去搵人稱喺戲院留低嘅陰毛多過腳毛嘅戲精華哥幫忙。
點知我一問華哥：「灣仔有咩戲院最出名？」
華哥一呆：「你講既出名… 係邊方面出名？」
我：「即係嗰Ｄ灣仔舊街坊冇人唔識既戲院囉！」呢Ｄ資料對我份報告應該係最有價值嘅野嚟。
只見華哥挾住嘅沙爹牛肉麵放到埋咀邊都停咗喺度，遞咗張單比我：「信我，你未必會想知道呢間戲院嘅事！」
我有D半信半疑，但始終佢係長輩，又係老豆介紹，有求於人，於是乎我都係埋咗張單：「華哥，慢慢講！」
華哥啜咗兩淡凍啡，想點支煙但比侍應制止咗，於是慢慢講咗一個非常詭異、佢話係真人真事嘅故事比我聽。
「呢間…就係灣仔舊街坊冇人唔識嘅——東城戲院！」
「東城戲院？有咩咁出名？」我有D想問佢攞返碗牛肉麵嘅錢。
「出名猛鬼！」
我吞咗淡口水，攞咗華哥杯凍啡啜咗兩淡，比佢屌咗句想飲自己叫。
我呢世人，最怕就係鬼！
其實我都做過Ｄ research，知道華哥講嘅呢間東城戲院喺 1964 年落成，位於灣仔駱克道與分域街交界。未改建成戲院之前，嗰度正正係香港人最熟悉嘅大酒店「萬國殯儀館」舊址，後來殯儀館後來搬咗去鰂魚涌。1976 年重建成咗一棟樓高 20 層嘅商業大廈，叫做東城大廈。
華哥點點頭：「我嗰陣好鍾意睇戲，無論新戲舊戲上，只要未睇過，就算睇過，我都會去睇翻！」
睇過都翻睇…呢點我真係不敢苟同。
「我個朋友係喺間戲院做售票，所以我喺嗰度睇戲唔駛錢，好多時間戲院冇乜人買飛佢就會叫我去睇。我記得嗰場戲佢明明話只係賣出咗十幾張飛，仲話任我坐，入到去果然係得嗰小貓三幾隻！我搵咗個位就坐埋去，隔離左右一個人都冇，包場咁滯！但係我就見到巡場嗰幾個入到嚟，面都青埋咁走出返去…
場戲睇咗冇耐，唔知係咪飲得太多水，睇睇吓急尿，嗱嗱聲去廁所，疴完篤尿洗手嗰陣自不然就會照吓前面塊大鏡，唔望由自可，一望竟然望見鏡入面自己側邊唔知幾時多咗個穿著白裙嘅長髮女人企咗喺度。只見呢個女人烏低身好似洗緊面咁既姿勢，當時我心諗大獲，唔通入錯女廁？
個女人問我：『你驚咩？』本來我想趁佢未睇見我之前就走人，點知比佢叫住，霎時間真係唔知點答佢好：『Err…』
點知佢慢慢抬起個頭，問：『你係咪見到啲咩恐怖嘢……好似我咁？』
當佢企返直……我見到佢塊面……係一片平滑、冇晒Ｄ眼耳口鼻……」
我問華哥：「咁咁咁……你都未嚇暈？」
華哥：「屌，暈咗就好呀！就係咁都未嚇暈先至瀨野！我比佢嚇到即刻就跑返入場，諗住起碼都有幾個人喺度！點知……」
「點知咩呀？連嗰幾個人都消失埋？」
華哥個咀Ｄ麵一條一條咁跌返落個碗度：「戲院入面……全院滿座！但係嗰Ｄ「觀眾」全部都係披頭散髮、一言不發、死氣沉沉咁望住個大銀幕，見我入嚟，全部頭同時慢慢轉去我嗰個方向……而佢哋塊面……全部都好似廁所入面見到嗰個女人咁，冇晒Ｄ眼耳口鼻！」
本以為件事到此為止，點知華哥仲話：「通常Ｄ人睇完戲，戲院成地都係戲飛飛尾，但清潔個阿嬸同我講，佢掃到既……通常都係溪錢衣紙！」
隨着東城戲院喺 1973 年結業並於 1976 年被重建成今日嘅東城大廈（East Town Building），呢Ｄ光影底下嘅靈異傳說雖然隨住建築物嘅消失而成為歷史，但至今提起「灣仔東城」，老一輩嘅香港人仍然會津津樂道，視其為香港都市傳說嘅黃金時代代表。