一個同學突然人間蒸發，身邊所有人都冇呢位同學嘅相關記憶，到底係乜野一回事？
2019年8月，一名使用網路帳號「衡謹臥石」嘅網友，發表一篇名為《不存在的同學》嘅網上文章，講述佢喺六年前發生嘅詭異故事，文章喺內地網絡熱爆，主角「潘博文」一夜之間成為話題。話說佢喺天津高中時，有一個叫潘博文嘅同學，點知查來查去，學校、老師、同學，甚至連檔案都話無呢個人！呢個故事就好似神秘劇情片，勾起無數人嘅好奇心，大家都喺度諗，究竟係真有其人，定係純屬虛構？今次就等我哋一齊睇吓，呢件事，究竟有幾成係真，幾成係假！
羽毛球場上的怪事：潘博文「消失」
事件始於2013年4月25日，一班天津高三學生喺學校操場打羽毛球，當中有個叫潘博文嘅同學。玩玩吓，羽毛球飛咗去宿舍嘅地下室，「衡謹臥石」與潘博文及另一個同學Ｌ三個一齊落去搵，結果出返嚟得返兩個人，潘博文就唔見咗！最離奇嘅係，返到課室，除咗佢同L兩個人之外，其他同學，句括老師，全部人都話從來無聽過「潘博文」呢個名，甚至連班級名冊、畢業相都搵唔到任何有關潘博文嘅痕跡，潘博文就好似徹底從呢個世界上消失一樣。「衡謹臥石」話，佢同Ｌ都清清楚楚記得潘博文嘅存在。佢同L並不認識，但同潘博文卻交情頗深，幾乎可以講係由細玩大，甚至乎仲記得佢喺政治課寫數學被老師鬧嘅場面。呢啲細節真實得令人毛骨悚然，有人開始懷疑：會唔會係平行宇宙？
抑或係精神壓力？
呢個故事一出街，即刻引起網上熱議。有人覺得呢單嘢好似科幻，潘博文可能穿越咗去另一個時空；亦有人提出係記憶錯亂，甚至可能同精神壓力有關。尤其係講故事嘅主角提到，當時佢哋正面對高考壓力，會唔會係壓力大到腦海無意識地走咗個「不存在的同學」出嚟？有啲網民仲話，佢哋都試過類似經歷，例如記得某個朋友，但搵唔到任何證據。呢啲討論令事件不斷發酵，2021年1月更一度推上微博熱搜第二位，故事嘅吸引力已經遠超一般都市傳說。
作者澄清：「只係作出嚟！」
到咗2021年1月，故事原作者終於現身，話潘博文係佢因為孤獨同壓力而幻想出嚟嘅「朋友」。佢提到自己當時可能有雙向情感障礙，所以腦海中創造咗呢個角色。作者仲同學校同學道歉，話因為一時衝動搞到成個社會亂晒。不過，呢個澄清唔單止無平息件事，反而仲令人質疑，係唔係有人施壓逼佢改口？同佢一齊去執羽毛球嗰個同學，都叫佢唔好再提呢件事，似乎事件已經成為禁忌。仲有人喺貼吧搵到2013年一個問「有無人識潘博文」的帖子，令人懷疑故事係咪真實存在。真相好似越挖越覺得迷霧重重。
記憶與現實
如果用科學角度睇，潘博文事件可能同記憶嘅複雜性有關。人腦有時會喺壓力下產生「錯誤記憶」，將幻想同現實混淆，尤其喺青少年時期，情緒波動大更容易發生。心理學研究顯示，約17%嘅人口可能有某種精神健康問題，雖然雙向情感障礙唔一定會引致妄想，但壓力確實可以令人腦模擬出栩栩如生嘅畫面。另一方面，平行宇宙嘅理論雖然喺物理學有討論，但目前無任何證據證明人可以穿越時空。潘博文嘅故事，會唔會只係一個孤獨少年嘅內心投射？又或者，係我哋太想相信有平行宇宙存在？
為何潘博文咁吸引？
潘博文事件唔單止係一個故事，更係一種集體情緒嘅反映。喺急速節奏嘅現代生活，人人都有失去朋友、懷念過去嘅經歷。故事喚起咗大家對「消失」嘅恐懼同好奇，仲有對未知世界嘅幻想。潘博文好似一個符號，代表咗我哋記憶中嗰Ｄ模糊但珍貴嘅片段。
會唔會每個人心入面，都有一個「潘博文」？立即上 nestalk.club 分享你嘅睇法！