如果你屋企養咗幾隻貓，應該試過見到佢哋突然「啪啪啪」互相掌摑，場面非常搞笑，但有時又令人擔心會唔會真係打起上嚟，因為見佢哋摑得都相當兇狠。見過唔少呢類「貓界武林大會」，覺得貓咪嘅行為真係謎一樣咁神奇！點解佢哋會忽然動起手嚟互摑？係單純玩吓，定背後有不為人知嘅動機？今次我哋一齊深入研究吓貓咪呢個行為，睇下佢哋「郁手郁腳」究竟想表達啲咩！
嚟玩啦！
貓咪天生係獵人，佢哋玩起上嚟多數帶點「野生」味道。你有冇試過見到兩隻貓突然互摑，然後下一秒就變成追來追去？呢啲「掌摑」通常係貓咪嘅邀請手勢，特別係喺幼貓同年輕貓之間好常見。佢哋會用收起爪子嘅「軟掌」，輕輕拍打對方，配合前傾嘅身軀同放鬆嘅鬍鬚，彷彿喺講緊：「喂，兄弟，嚟一場模擬狩獵啦！」公開資料顯示，貓咪嘅玩耍行為有助鍛煉佢哋嘅反應同社交能力，同我哋去做「Gym」相差無幾，當然，你搵朋友一齊去做Gym唔會兜巴星佢先至同佢講不如一齊去做Gym，咁攪法真係交都有得打，證明貓咪比人類大方好多！
不過，咁玩法有時真係會玩出火。試過見到貓咪玩到一半突然「火氣大」，由軟巴掌變硬拳，仲可能帶點低鳴聲。呢啲「玩大咗」嘅情況就好似小朋友玩到過晒火一樣咁激動，點樣幫佢哋冷靜落來？多啲互動玩具同定時玩耍可能係好方法。
爭地盤
貓咪天生有地盤意識，特別係喺多貓嘅家庭，佢哋會用「兜巴星」去確立誰係「渣fit人」。一隻貓可能會突然拍另一隻貓嘅頭，伴隨住耳朵向後、尾巴甩動，擺出一副「呢度我話事」嘅姿態。呢種行為多數出現喺有新貓加入家庭，或者資源（例如飯碗、貓砂盆）唔夠分嘅時候。根據動物行為研究，貓咪會透過呢類輕度攻擊去建立階級，減少埋牙隻抽嘅機會。
但點解有啲貓咪特別霸道？如果一隻貓未有足夠社交經驗，或者係未絕育嘅貓公，佢哋嘅地盤意識會更強，兜巴星嘅頻率亦會高啲。呢點提醒大家，養多隻貓嘅朋友，記得確保每隻貓都有自己嘅「地盤」同資源，減少爭執嘅機會。唔通你想見到你屋企變成日日貓毛橫飛嘅戰場？見埋紅就真係呵呢陀佛嘞！
咩呀！唔爽咪郁你囉！
貓咪同人類一樣，都有情緒爆發嘅時候。當佢哋覺得壓力大、悶或者受驚，兜巴星可能係佢哋嘅一種宣洩方式。試想像一隻貓被另一隻貓煩到死，或者環境有變（例如新傢俬、陌生人到訪），佢可能會突然「啪」一聲拍向身邊嘅貓，呢啲動作通常伴隨緊張嘅身軀、扁平嘅耳朵同快速甩尾，係貓咪嘅「情緒紅燈」。
點樣幫貓咪減壓？建議定時同佢玩互動遊戲、豐富嘅環境（例如貓樹、玩具）可以幫貓咪放電，減少呢類情緒性嘅掌摑。試過見到朋友嘅貓因為無聊而互相拍來拍去，點知一放條羽毛棒，佢哋即刻轉移目標，變成追玩具嘅「獵人」，見到呢啲情景，真係比佢激到「啤」一聲叫咗出嚟，仲有似曾相識嘅感覺，點解貓咪嘅情緒咁似阿B仔嘅！
可能唔舒服喎
你有冇諗過，貓咪突然變得鍾意掌摑，可能係身體唔舒服？根據獸醫研究，貓咪如果有牙痛、關節炎或者其他隱性疾病，佢哋可能會因為痛楚而變得易怒，隨手一巴掌拍向身邊嘅同伴。呢啲「病態兜巴星」通常伴隨其他徵狀，例如食慾下降、躲起嚟或者發出異常嘅叫聲。見到貓咪行為突然改變，應該即刻帶佢去獸醫檢查。
見過有貓突然對另一隻貓「開拖」，仲伴隨低鳴同縮喺角落，後來檢查發現係牙周病作怪。治療後，呢隻貓即刻變返「和平使者」。所以，當你見到貓咪嘅掌摑行為變得頻繁，或者同平時嘅性格唔同，千祈唔好掉以輕心，可能係佢用兜巴星向你「求救」都未定！
破解貓咪嘅掌摑密碼
貓咪互摑，背後原因可以係玩、可以係爭地盤、亦可以係情緒宣洩，甚至健康問題。要破解呢啲行為密碼，關鍵係觀察佢哋嘅肢體語言同環境變化。係咪玩緊？有冇壓力？定係身體唔舒服？只要用心留意，貓咪嘅「掌摑語言」其實唔難懂。想你嘅毛孩和平共處？多啲互動、豐富嘅環境同適時嘅獸醫檢查，絕對係幫佢哋減少「隻揪」嘅好方法。你點睇貓咪嘅呢啲行為？係咪已經習以為常由得佢分出高下打到甩毛？立即上 nestalk.club 分享你貓咪嘅趣事！