夜媽媽，好多家長可能正喺度同小朋友周旋，好彩嘅細路都瞓晒，可以有返Ｄ私人時間嚟檢討自己今日嘅所作所為。夜闌人靜，又總令人多咗啲遐想，而大多數家長們苦惱嘅，通常都係諗緊點樣教好佢哋嘅子女。近年有好多家長開始覺醒，開始探索新嘅教養方式，試圖喺忙碌生活中搵返融洽教家庭生活。小編整理咗10個基本法則，希望可以幫你同小朋友一齊成長，保證簡單又貼地！唔信？跟住入嚟睇吓，包你有驚喜。
傾心傾肺：溝通係王道
同小朋友傾吓計，唔係浪費時間，而係培養感情嘅橋樑。每日抽幾分鐘問問佢哋今日點樣，關心吓佢生活嘅點滴，咁做唔單止可以知道佢人生路上有冇遇到Ｄ咩困難，可以有機會及時幫到佢，而且咁樣佢哋會覺得被重視。呢啲對話就好似一劑潤滑劑，會化解好多潛在嘅矛盾。得唔得閒都試下，效果可能比你想像中好。
彈性規矩：唔好太死板
規矩係教養嘅基礎，但太嚴格只會適得其反。畀小朋友一啲選擇空間，例如「你想點樣完成功課」，如果佢話要倒立咁做，你可能會覺得有冇攪錯，不過只要佢真係做到其實又有乜所謂，咁反而會令佢哋更合作。呢個方法簡單，但絕對有效。
真心讚賞：幫佢建立自信
一句「Well done!」可以令小朋友信心大增，包保好過你成日批評。當然唔係叫你踩到狗屎都讚佢腳法好，而係要適當嘅讚賞，咁唔係寵壞佢哋，而係幫佢哋建立積極態度。記住，真誠最重要！
安全意識：防患未然
小朋友嘅安全永遠排第一，無論係屋企定係戶外。教佢哋認識危險，例如唔好跟陌生人走，係基本功課。呢啲知識就好似一層保護網，值得早啲灌輸，你話洗腦都係咁話。
飲食平衡：健康從口入
食得好，小朋友自然長得好。唔使日日逼佢食青菜，但要確保佢哋有足夠營養。小朋友揀飲擇食？或者可以試吓一齊煮飯，唔單止有趣，自己煮出嚟嘅餸一來佢唔會話唔好食，二來仲可以畀佢哋學識均衡飲食嘅重要性。試吓，對付呢Ｄ小學雞效果一流！
定時睡眠：成長嘅秘訣
小朋友瞓得少，情緒同學習都會差。專家話，8至10小時睡眠係必要，父母一定要幫手定規矩。呢個習慣係建立好生活模式嘅開始，必需持之以恆，否則你就會養咗隻安安或者可可出嚟。
隨性學習：戒除攀比
成績唔係育兒嘅唯一指標，強迫小朋友超載只會適得其反。其實並唔係你個小朋友唔掂，係個大人唔掂，睇住人哋嗰個嚟迫自己嗰個，你又有冇諗過，其實每個小朋友嘅步伐都唔同，智力、情商、天賦唔會一模一樣，畀佢哋適當嘅學習空間，進步自然會嚟。放鬆啲，效果更好。
情感陪伴：難過時靠你，你靠得住嗎？
小朋友都會有情緒低落，爸媽嘅擁抱係最好嘅安慰。情感支持唔代表佢軟弱，而係畀佢哋支持，勇敢面對挫折。問佢「有咩煩惱可以同我講」，或者你會有意外收穫。
屏幕限時：控制得好就啱
手機同平板係小朋友嘅新寵，但過多屏幕時間會影響視力同社交。其實方法好簡單，定個每日一小時限額，然後一齊玩實體遊戲，平衡啲會健康啲。
家長充電：你都要休息
做爸媽返工已經攰到暈，仲日日對住隻化骨龍，精神同體力都透支，仲點教好子女？適當畀自己時間喘息一下，例如睇場戲或者同朋友傾計聊天，記住係聊天唔係裸聊，呢Ｄ係必需要嘅調劑。精神好咗，家庭先會更和諧，呢點係關鍵。
呢10個法則唔係教條，而係一啲實用嘅指引，幫爸媽喺教養路上走得更穩更輕鬆。育兒好似一場困獸鬥，關鍵在於點樣係囚房內同兇猛嘅子女和平相處之餘，仲要教曉佢哋做人嘅方法、原則同價值觀，相信我，試下呢啲方法，成果會慢慢出現。
講出你嘅故事！
想同全球家長分享你嘅育兒十招？立即上 nestalk.club 註冊成為會員發表，又或者到討論區講吓你嘅育兒經驗，畀世界聽到你嘅聲音！