教養新趨勢：唔使吓吓鬧既
你有冇試過同孩子講道理講到火都嚟埋，最後忍唔住破口大罵？唔少家長都話，教養路上最難嘅一關，就係點樣喺怒氣爆發時按住自己嗰把火。有調查指，超過六成父母承認至少試過一次喺孩子面前失控大喊，事後又後悔到想死。尤其係今時今日，全球各地嘅家長都追求更溫和嘅教養方式，特別係喺一D歐洲國家如丹麥同芬蘭，當地父母多數用正向教育，減少吼罵，專注同孩子建立互信關係。咁點先可以喺關鍵時刻冷靜落嚟，唔使一味靠惡？今次就同大家分享五個實用法門，幫你同孩子建立更和諧嘅關係！
做法一：老憎入定！畀自己五秒緩衝，營做冷靜空間
家長一起火，腦袋就會好似短路咁，俗稱「 short Q 咗」，講出嚟嘅說話絕對有七傷拳嘅威力，傷人又傷己。識野嘅父母都會用一個簡單嘅「五秒法則」：覺得怒氣上升時，先停低，深呼吸五次，數一數一二三四五。呢五秒唔單止畀你冷靜嘅空間，仲可以令你已經舉起咗諗住一野星落去嘅化骨綿掌暫時停落嚟，幫你重新諗清楚點樣同孩子溝通，好似有個「暫停掣」咁，將原本想鬧嘅惡毒說話都吞番落肚，冷靜落嚟之後就可以用平靜嘅語氣同孩子講道理，效果絕對比你火燒心時嘅行為好多。呢個方法唔使學複雜呼吸吐納，即學即用，特別適合自以為忙碌又無內功底子嘅怪獸家長。
做法二：移魂大法！轉移注意力，畀孩子同自己一條出路
有時細路唔聽話，家長怒氣攻心係因為覺得自己「輸Ｑ咗」。醒目嘅父母好多時會用「轉移法」去化解僵局，例如見到孩子唔肯收玩具，唔使即刻鬧，試下話：「不如我哋一齊比賽，睇下邊個快手啲！」咁樣一來，唔單止將注意力轉移到遊戲上，仲可以畀孩子一個台階落，唔使硬碰硬。有家長分享話，試過同孩子講：「我數到三，你唔收玩具我就會同你一齊跳舞！」結果孩子笑到四處走，氣氛即刻變輕鬆，最後D玩具都係個家長自己執。轉移注意力唔單止幫你止住怒氣，仲可以同孩子建立多啲歡樂時光。
做法三：動之以情！講野用「我」唔用「你」，講感受唔指責
吼罵嘅問題係好多時會變成指責，例如話「你點解咁唔聽話！」咁講法只會讓孩子覺得被攻擊，反而更反抗。識得用感情綁架嘅醒目父母好多時會用「我」同孩子溝通，例如將「你點解唔做功課」改成「我見你仲未做功課，覺得有啲擔心，因為我希望你有好成績。」咁講唔單止表達咗你嘅感受，仲畀孩子知道你係關心佢，而唔係想鬧佢。有人試過用呢招之後，孩子好似明白父母嘅用心，會主動解釋未做功課係因為玩手機，雖然最後佢老母都係忍唔住鬧咗一獲甘嘅，但起碼開始時溝通係順暢咗好多。呢個方法最重要係講出真實感受，孩子會感受到你嘅誠意。
做法四：約法三章！同孩子一齊訂「情緒公約」，預防衝突
教養唔單止係即時應對，仲要預防問題出現。有家庭會同孩子一齊訂立「情緒公約」，例如約定「如果我同你講嘢講到好大聲，你可以同我講『冷靜一下』，我會停低同你一齊深呼吸。」咁樣嘅公約唔單止畀孩子參與感，仲可以喺衝突前提醒大家冷靜。有人試過同孩子講好「如果我好嬲，你可以同我講『飲啲水啦』」，結果果次真係好嬲時，佢個細路成杯水潑過嚟，仲笑住講「飲啲水啦」，佢老豆即刻追住佢嚟砌，氣氛即刻變溫馨。呢個方法需要同孩子一齊商量，畀佢哋覺得自己嘅意見被重視，衝突自然少咗。
做法五：賽後檢討！畀自己同孩子成長嘅機會
用以上方法有時難免都忍唔住發火。叻叻豬嘅父母好多時會喺冷靜後同孩子一齊檢討，例如話：「我剛剛同你大聲講嘢，係我唔啱，你覺得下次我可以點樣做得好啲？」咁樣唔單止畀孩子見到你嘅真誠，仲教佢點樣承認錯誤同成長。有家長話，試過同孩子講「我今日好累，所以同你發咗脾氣，對唔住」，結果孩子反而主動抱住佢講「知道錯就好啦，我會原諒你的。」反思唔係單方面，除咗可以修補關係，仲可以畀孩子學會點樣處理自己嘅情緒，係教養中重要一課。
教養路漫長：一齊學做更好嘅父母
教養孩子從來都唔係易事，但用吼罵去解決問題，只會破壞關係。呢五個做法，無論係老憎入定、移魂大法，定係動之以情、約法三章，都係希望家長同孩子可以喺衝突中多啲理解對方嘅感受。教養唔係要控制孩子，而係同佢一齊成長。想同其他家長交流教養心得？上 nestalk.club 加入全球網友嘅討論，分享你嘅經驗，一齊學做更好嘅父母！