移民英國，係夢想定惡夢？
幾年前，英國推出BNO簽證計劃，畀咗香港人一條通往新生活嘅路。喺香港國安法實施後，超過15萬港人揀咗拎起行李，飛往英國，追尋新嘅人生篇章。點知，抵達彼岸後，搵工竟然成為一大難關，處處碰壁！點解即使擁有高學歷嘅港人，喺英國職場都咁難搵食？原因係咩？今次就同大家一齊睇吓BNO移民搵工嘅心酸路，仲有佢哋點樣喺逆境中咬緊牙關！
搵工難，難喺邊？
BNO簽證畀港人喺英國有工作嘅權利，但現實係，有工作權利唔代表有工作比你做，搵份工真係唔容易！好多移英港人擁有大學學位，甚至碩士、博士學歷，但點解仲係四處碰壁？主要原因不外乎呢三個：語言、文化同資格認同。香港人英語唔係母語，就算講得再流利，喺職場上同本地人比，總會有啲溝通障礙。有人試過同英國同事開會，港人可能因為唔熟識英國職場嘅「潛規則」，例如點樣表達意見先至唔會顯得太進取，結果畀人覺得「唔夠融入」。再加上香港人嘅專業資格，特別係醫生、會計師、工程師等，喺英國往往唔被直接承認，申請認證又係一條漫長又燒錢嘅路。
唔少港人喺網上討論區分享，話自己投咗過百份CV，連個面試機會都攞唔到，仲有啲人話英國僱主好似對外來者有戒心。呢啲經歷背後反映咗咩問題？係英國職場有「隱形門檻」，定係港人對當地職場了解太少？
高學歷低回報？
港人向來以高學歷聞名，特別係移英嘅BNO持有人，好多都係專業人士。據英國內政部數據顯示，截至2024年，超過19萬人申請BNO簽證，當中唔少人擁有學士甚至更高學位。但點解學歷高，搵工仲係咁難？其實答案顯而易見。英國僱主當然首先希望求職者有本地工作經驗，牌照要本地認可，冇本地經驗，專業資格又唔被英國認可，英國僱主自然覺得你「麻麻地」。就算你喺香港，你都會見到寫字樓內多數都係本地人，唔需要牽涉到歧視咁複雜，答案本來就係咁簡單！你試吓問吓喺香港嗰D內地嚟嘅清潔工，人哋有D喺大陸做老師，嚟到香港一樣做唔返教師都係呢個原因。
仲有，英國嘅職場文化同香港唔同。香港人習慣快節奏、高效率，英國職場卻講求work-life balance，唔少僱主更重視你嘅社交能力多過你嘅工作能力，即係你能唔能夠同同事好好相處。有啲港人話，英國同事好似唔太接受「加班文化」，令到港人嘅勤力有時反而畀人誤解為「太aggressive」。呢啲文化差異，就好似一幅無形嘅牆，考驗港人嘅適應力！
由高做低，心理關難
搵唔到理想工作，好多港人唯有放下身段，由低做起。喺香港做慣管理層，嚟到英國可能要喺超市做收銀，或者喺餐廳做侍應。呢啲工作雖然唔需要專業資格，但對好多港人嚟講，心態上絕對係一個大挑戰。試諗吓，喺香港指人做野，依家比人指住做野，落差的確相當大。有網民話，見到朋友由專業人士變成外賣仔，甚至開始懷疑移民嘅決定係咪正確選擇。
但係，呢啲由低做起嘅故事，其實亦有積極面對嘅一方。唔少港人選擇咬緊牙關，因為佢哋相信，呢啲只係過渡期。喺英國，搵工雖然難，但只要肯做肯試，總有機會翻身。問題係，呢份堅持，你可以堅持到幾耐？係咪值得？
職場歧視？定係融入問題？
講到搵工難，唔可以唔提職場嘅「隱形歧視」。有接受訪問嘅港人，或者我哋叫佢做阿 Ann，佢話：「我好明顯感覺到自己被邊緣化，Ｄ同事唔知做乜要排擠我，工作上刻意對我製造唔方便，仲成日喺度冷嘲熱諷，佢緊係以為我唔識聽，日日返工都係咁精神壓力真係好大，結果最後我真係忍受唔到唯有裸辭！我老公嚇到面都青埋，因為忽然少咗一份收入，變相就入不敷支。」
雖然英國係一個多元文化嘅國家，但作為新移民，港人始終係少數族裔，難免會畀人標籤為「外來者」。不過我哋唔好講到種族歧視咁嚴重，搭巴士時即使你隔離坐個相同國籍嘅陌生人，你都可能會覺得周身唔聚財，更何況而家同一屋簷下，人人等出糧？同人相處當然係需要時間磨合，所以我唔會覺得港人自己太敏感，而係真有其事，佢的確係唔妥你，只係未去到歧視你咁誇張，吓吓諗到咁你點繼續喺異鄉生存，建議大家就算真有其事，都要維持好自己既心態，聽到都當聽唔到，唔好咁容易被技術性擊倒，咁你先至可以喺一個全新既國度繼續生存落去。
融入異地社會絕對係一個大挑戰。英國人嘅社交圈好多時圍繞pub文化、足球同本地話題，港人未必即刻跟得上。有港人分享：「同個英國同事傾計，提到香港嘅政治同歷史，點知佢根本冇興趣，仲即場攪到有啲尷尬，你話死唔死？」點樣喺陌生環境搵到歸屬感？呢個問題，唔單止關乎搵工，更關乎你係咪搵到幸福感，關乎你嘅整個人生。
錢銀問題，搵唔夠仲要畀貴租
講到移民嘅心酸，點可以唔提錢？英國生活成本高，特別係倫敦，一個人租間房租金動輒每月都要800鎊以上。搵唔到穩定工作，點樣應付咁高嘅開支？有啲港人話，嚟到英國之後，儲蓄就好似開水喉咁一陣就用完。試問，無穩定收入，點樣喺呢個新環境企穩陣腳？
更嚴峻嘅係，BNO簽證雖然畀港人工作權利，但無提供任何經濟援助。喺香港，政府好歹都有失業救濟，起碼都有個家喺背後支持，但係嚟到英國就只有完全靠自己。呢種「自力更生」嘅壓力，對於新移民嚟講確實係一個大考驗，好多港人都要重新審視自己嘅財務計劃。
堅持定放棄？港人嘅抉擇
雖然搵工難，但絕大部分港人選擇留低。點解？因為好多人都覺得，移民唔單止為咗自己，仲係為咗下一代嘅未來。英國嘅教育同醫療系統，雖然唔完美，但比起香港嘅高壓環境，始終有吸引力。加上，BNO簽證提供一條入籍路徑，畀到港人一個嘅希望。問題係，呢條路你有冇本錢捱得住，可以行到最後？
有啲港人開始反思，移民嘅代價係咪太高。搵唔到理想工作，生活壓力大，甚至要同家人分隔兩地，呢啲心酸背後，到底值唔值得？但另一方面，好多港人嘅韌性又真係令人佩服。無論係喺職場重新開始，定係努力學英語、考資格，佢哋都用行動證明，困難只係暫時。
搵工攻略，港人點突圍？
既然搵工咁難，有咩方法可以幫到港人？首先，學好英語絕對係關鍵。唔單止要講得流利，仲要明白英國職場嘅語言同文化。參加本地嘅職業培訓課程，或者搵一啲義工機會，都係累積本地經驗嘅好方法。仲有，網絡係一個寶庫，唔少港人透過LinkedIn同本地招聘網站，搵到第一份工作。
另外，港人可以考慮一啲新興行業，例如科技、綠色能源或者創意產業。英國嘅勞動市場雖然同香港一樣競爭激烈，但新興行業對外來人才嘅接受度相對較高。點樣搵到自己嘅定位？或者，港人需要更多嘅創意同勇氣，去開拓新嘅可能性。
前路漫漫，港人點樣走下去？
BNO移英港人嘅搵工路，注定唔係一條易行嘅路。語言、文化、資格認證、經濟壓力，每一個挑戰都考驗緊港人嘅決心。但正如一句老話：「條條大路通羅馬。」只要肯學肯試，總有出路。喺呢個新環境，港人唔單止要搵工，更要搵到屬於自己嘅人生價值。
你點睇BNO移民嘅挑戰？立即上 nestalk.club 註冊成為會員加入討論，或者喺我哋新增設既討論區，分享你嘅搵工心得，話唔定你嘅經驗可以幫到其他港人！共勉之！