香港人一向走在時代尖端，就連比人呃都一樣身先士卒。皆因佢哋熱愛網購，所以就容易跌入騙徒陷阱！近日，香港警方雷霆出擊，喺短短兩星期內搗破120宗網購騙案，拘捕118名疑犯，涉案金額高達500萬港元以上。呢啲騙案點解會不斷出現？而犯案手法又可以層出不窮？事主點解明知有風險仲係中招？今次我哋唔單止話你知騙徒嘅狡猾手法，仲會拆解事主嘅心態盲點，等你可以做個精明網中人！
雷霆行動：警方兩週拘118人，涉款超500萬
今次不得不讚讚警方嘅辦事效率！喺6月9日至20日嘅12日行動中，網絡安全及科技罪案調查科聯同各警區，鎖定網購騙案同洗黑錢罪行，成功拘捕118名疑犯，年齡由18歲到74歲，當中82男36女，背景五花八門，大部分竟然係無業人士。呢120宗案件涉及300名受害人，總損失超過500萬港元，最大單一案件更涉款100萬！點解網購騙案會咁猖獗？警方話，隨住啟德體育園開幕，演唱會門票需求急升，成為熱門商品，騙徒於是趁機出動，自然容易找到獵物。呢啲案件絕對係一個警號，提醒我哋網購必需留神！
騙徒套路大解構：假賣家、假網頁、無底洞
騙徒到底係點樣呃人？佢哋嘅手法層出不窮，最常見係喺網購平台假扮賣家，聲稱有演唱會門票、電子產品或者玩具模型等熱門貨品，並以低價作招徠。受害人一有興趣，騙徒就轉用WhatsApp等通訊程式，話要私下交易，要求事主將錢轉到一D俗稱「鬼戶口」嘅收款帳戶，貨款一到手就即刻失聯！仲有更進階嘅套路，騙徒會設計假網頁，誘導事主輸入銀行資料同密碼，結果連積蓄都被轉走。最大宗案件就係一名事主誤入假網頁，損失100萬港元！嗰D網頁真到難分真假，信以為真都真係唔出奇！
事主心態拆解：貪平心理同急於追款嘅陷阱
咁點解咁多人中招？網購騙案多數係利用人性嘅弱點—貪平係最大誘因！見到演唱會門票或者名牌貨低過市價，事主往往開心到老豆姓乜都未必記得，以為執到筍野，於是衝動下單，忽略查證賣家背景。仲有，部份受害人喺受騙後急於追回損失，結果畀騙徒呃完又呃！例如有事主收到假「追數專家」嘅消息，話可以幫手討回損失，但要先付保證金，結果損失更大。警方提到，有受害人為咗2萬元現金獎，繳付46萬保證金，點知係空歡喜一場。點解會用23倍既成本去保證嗰2萬蚊？佢係冇諗清楚定係計數機壞咗？呢啲案例真係令人搖頭，點解咁容易比人呃？
警方出招：移除3萬多假帳號，教你避開陷阱
警方唔單止拉人，仲主動出擊！今年1月至5月，佢哋要求社交平台移除超過33,900個懷疑騙徒帳號同專頁，務求將騙案扼殺喺搖籃。警方仲成立專責小組，透過情報分析鎖定本地騙徒，甚至搗破6個犯罪小組，當中有單獨犯案，亦有團體作案。警方建議大家透過官方渠道買票，例如演唱會門票最好直接搵主辦方，或者用信譽良好嘅支付平台，仲要選擇當面交收。講真，網購真係要多留心，唔好畀「平價」沖昏頭腦！
網購騙案為何屢禁不絕？
網購騙案點解咁難斷尾？2024年全港錄得44,480宗詐騙案件，當中網購騙案佔六成，損失金額高達49.2億港元！今年首季，網購騙案更比去年同期升三成，達到3,076宗。隨住網購成為生活一部份，騙徒趁機利用新興平台同熱門活動，例如啟德體育園開幕帶動嘅門票需求，設計更精密嘅騙局。網上討論間唔中會見到網民抱怨：「而家網購真係步步驚心，連正規平台都有假貨！」但騙徒手法再新，背後都係利用人性嘅貪念同疏忽。
防騙三招：點樣做個精明網購人？
想喺網購世界唔再比人坤？三個貼士幫到你！第一，查證賣家背景，睇吓有無實體店或者評價，唔好見到平就即刻撲過去。第二，用第三方支付平台，例如PayPal或者信用卡，萬一有問題仲有機會追返貨款。第三，遇到可疑要求，例如要你轉賬到私人戶口或者畀保證金，立即Say No！買野仲有咩保證？你叫佢保證冇假仲好啦！警方仲提醒，遇到「追數專家」要特別小心，呢個分分鐘係「整蠱專家」，查清楚對方背景先好行動，做個精明消費者！
網購安全，自己負責
網購騙案層出不窮，但只要多一份警覺，騙徒嘅伎倆未必得逞。香港警方今次嘅雷霆行動，證明佢哋打擊科技罪案嘅決心，但市民都要為自己嘅網購安全負責。喺呢個資訊爆炸嘅年代，學會分辨真假先至係醒！想同大家分享吓你點比人呃？立即上 nestalk.club 註冊成為會員加入討論，或者喺我哋新增設既討論區，分享你既睇法！