英國政府一紙白皮書，話要將移民簽證持有人申請永久居留（ILR）年限由5年拉長到10年，加辣入籍嘅英語要求，仲可能包括以BNO申請移英嘅香港人！呢個「10+1」消息一出，喺英國20萬香港BNO移民嘅討論之聲不絕… 點解英國突然變陣？新政會唔會真係影響到香港人？今次同大家講吓呢場移民政策風波，睇下BNO持有人點樣喺呢種不確定性中尋找出路！
點解話改就改？
2025年5月12日，英國首相基爾·斯塔默拋出一份《恢復移民系統控制》白皮書，話要將所有移民申請ILR嘅年限由5年延長到10年，仲提到要收緊語言要求。雖然白皮書冇直接點名BNO簽證，但提到「香港人」同「特殊承諾」，搞到大家心慌慌，咁即係BNO持有人駛唔駛捱多5年？
點解英國突然出呢招？係因為淨移民數字爆表——2023年高達90萬，2024年仲有70萬，遠超2019年嘅22.4萬。政府話要減移民數量，紓緩公共服務壓力，仲要確保新移民融入社會。BNO簽證自2021年推出以來，吸引咗近20萬香港人移居英國，其實都只係佔咗移民數字入面嘅一小塊，係咪真係有必要搵我哋嚟開刀呢？
問題來了，當年BNO簽證係為香港人提供「人道主義承諾」，同技術移民唔同，點解要辣埋我哋香港人？有人話，英國政府好似一時一樣，一陣同你講人道立場，一陣又同你講人太多好難攪，令人懷疑係政治操作多過實際需要。
新政點打擊香港人？
延長ILR年限，對於BNO移民嚟講，唔單止係等多幾年咁簡單。喺香港，BNO移民要攞到ILR先至可以提取強制性公積金（MPF），呢啲儲蓄總額估計高達30億英鎊。若果新政真係推行，香港人要多等5年先攞到呢筆錢，財務壓力即時飆升，原本計劃用MPF喺英國買樓或者投資嘅家庭，依家要重新部署，你話點算？
仲有，BNO移民喺攞到ILR之前，子女喺英國讀大學要畀國際學生學費，動輒每年幾萬鎊。延長5年，隨時多使20萬至30萬港幣，對於一啲中產家庭嚟講，係個大包袱。有人話：「我哋係相信英國政府嘅承諾先至連根拔起咁過嚟，點知依家洗濕咗個頭，褲都除埋佢先至話5年變10年，大佬，人生有幾多個十年嘞你話？」喺英國重新開始已經唔容易。依家政策變嚟變去，令人覺得「講好嘅承諾點解可以話改就改？」有移民坦言，係唔係要考慮吓去其他國家。
語言要求加辣
白皮書提到要提高英語語言要求，話係為咗令移民更好融入英國社會。呢個要求聽落合理，但對BNO移民嚟講，未必係小事。雖然香港人普遍有英語基礎，但好老實講，好多都真係基礎過唔基礎，正式嘅語言測試（例如IELTS或者「Life in the UK」測試）唔係人人都可以輕鬆過關，特別係一啲全職照顧家庭嘅BNO持有人，可能冇時間同資源去準備考試，依家仲要提高要求？唔好玩啦！
更何況，BNO移民多數已經喺英國生活、工作，甚至創業，佢哋嘅融入能力真係需要用一紙試卷去證明？有網民話：「我哋喺英國搵工、交稅，仲要考試證明自己可以融入社區？就算真係溝通唔到，依家AI翻譯咁勁，我唔覺得呢個係問題囉！即係等於打字，係咪一定要識先？可以語音輸入架嘛！」呢個新要求，可能會變成一堵隱形嘅牆，阻礙香港人嘅移民之路。
英國經濟同BNO，雙贏變雙輸？
BNO移民對英國經濟嘅貢獻有目共睹。呢20萬人淨係比IHS都已經比咗差不多七八十億，而且佢哋好多都係專業人士或者服務行業從業員，幫英國填補咗唔少勞動市場缺口。喺倫敦、曼徹斯特等地，BNO移民開嘅餐廳、診所、小生意比比皆是，帶動當地經濟。咁樣算唔算融入英國社會？算唔算對英國有貢獻？點解政府仲要喺呢個時候「加辣」？
若果「10+1」政策真係適用於BNO移民，可能會有反效果。延長ILR年限同提高語言要求，會增加移民嘅生活成本同心理壓力，部分人可能選擇離開英國，甚至回流香港或其他國家。呢啲人一走，英國經濟同多元文化可能會蒙受損失。當然，咁大個國家咁大個政府絕對唔會因為你嗰小小人小小錢而失衡，但如果政府目的只係話要「控制移民」，最終可能得不償失。
政策未定，香港人點應對？
截至2025年7月2日，「10+1」政策仲係提案階段，尚未正式立法。英國國會圖書館資料顯示，呢啲變更要經過公開諮詢同修訂移民規則先可以實施，仲有可能唔會追溯影響現有BNO移民。但政府至今冇明確表態，話BNO簽證會唔會豁免，搞到BNO移民好似半天吊。
有團體已經開始行動。某關注香港移民嘅組織喺5月13日去信內政大臣，要求澄清政策詳情，仲喺5月21日發起請願，呼籲政府維持「5+1」承諾。BNO持有人亦唔係坐以待斃，有人開始搵移民律師，研究其他簽證途徑，例如技術工人簽證；亦有人提早報讀英語課程，準備應對可能嘅新要求。
最令人擔心嘅，係政策不確定性帶嚟嘅心理負擔。有人話，原本計劃五年後可以喺英國落地生根，依家要重新規劃，甚至考慮其他移民目的地，例如加拿大同澳洲，因為你唔會知道，「5+1」變「10+1」之後，會唔會再整個「20+1」或者「100+1」出嚟，正所謂一不離二。
香港人仲有無Plan B？
BNO簽證嘅初衷係英國對香港人嘅人道主義承諾，但如果由有承諾變為冇承諾過，香港人會唔會轉投其他國家？加拿大同澳洲一直有吸引香港人嘅移民計劃，條件相對寬鬆，例如加拿大嘅「救生艇計劃」同澳洲嘅技術移民簽證。呢啲國家嘅政策穩定性同生活成本，可能會吸引一啲對英國新政失望而又有錢嘅BNO持有人。
香港政府亦可能見機行事，吸引回流。例如推出優惠政策，鼓勵BNO持有人返港投資或創業。問題係，依家嘅香港，會唔會真係吸引到移民回流？呢啲都真係只有天知地知，你同我都唔會知。
英國政府嘅盤算
英國政府點解要喺呢個時候推「10+1」？表面上係回應國內反移民情緒，但實際上可能有更複雜嘅盤算。白皮書提到，某些移民若果對英國經濟或社會有重大貢獻，可能會獲豁免或縮短ILR年限。呢個「彈性」條款，會唔會係BNO移民嘅救命稻草？
英國政府要喺國內壓力同國際承諾之間搵平衡。BNO簽證係英國對香港人嘅歷史責任，若果一刀切，可能會畀國際社會批評為「講大話」。反過來，如果豁免BNO移民，又可能畀反移民團體話政府「偏心」，咁點收科？
BNO持有人點走下去？
「10+1」政策嘅最終走向，仲要睇英國政府嘅公開諮詢同立法進程。BNO移民現階段唯一可做嘅係，係密切關注政策動向，積極參與諮詢，表達自己嘅訴求。同時，財務規劃同語言能力提升都係必要嘅準備。
未來幾個月，英國政府嘅態度將決定BNO持有人嘅信心。如果「5+1」承諾得以維持，香港人喺英國嘅移民路就可以繼續平穩；但如果「10+1」真係落實，BNO持有人可能要重新考慮自己有冇揀錯，或者尋找新嘅出路。
你有冇喺呢個移民潮瀨野？有冇反思一下自己喺人哋國家有冇貢獻？有冇同人哋Ｄ亞婆搭巴士爭位座？有冇隨哋丟垃圾引起社會公憤？立即上 nestalk.club 註冊成為會員加入討論，或者喺我哋新增設既討論區，分享你作為BNO移民嘅自身經驗或所見所聞！