你有冇試過朝早九點，著好西裝，拎住個咖啡杯扮返工？但其實你只係準備去咖啡店打躉！喺內地，呢種「扮返工」唔係笑話，而係真金白銀嘅新興生意！近年，內地大城市如北京、深圳、重慶等地，有唔少人開始經營呢種「假裝上班公司」，佢哋專為失業青年、自由工作者或者想保持生活規律嘅人提供一種模擬辦公嘅環境。每日30至50蚊人民幣，你就可以租個工作位置，有Wi-Fi，有咖啡，甚至仲有免費午餐，比錢人去扮返工問你死未！呢股熱潮背後，係咪反映經濟壓力同社會期望經已嚴重失衡？香港，作為內地文化嘅近鄰，會唔會遲早「認祖歸宗」一齊扮返工？又或者，香港早就以另一種方式去演繹呢股衝擊？今次就同你一齊睇睇呢個奇怪現象，睇吓佢哋點解扮返工扮得咁過引！
點解要「扮返工」？
內地經濟近年唔係咁掂當，青年失業率喺2025年第一季高達16.5%，好多年輕人搵唔到工，或者搵到嘅工同期望相差十萬八千里。呢班人唔想日日喺屋企被家人嘅「關愛眼神」強姦，又或者想保持返工嘅儀式感，所以就選擇比錢「扮返工」。呢啲地方提供寫字樓環境，有齊枱櫈椅、打印機，甚至仲有會議室同咖啡機，畀你有五星級嘅朝九晚五體驗。有啲人甚至著晒西裝喺度扮覆電郵、扮寫計劃書，扮到十足十成個職場精英咁款。點解要咁做？目的唔係為咗呃人，而係想畀自己一個心理安慰之餘，安慰埋日日問候你既屋企人同親朋戚友，甚至可以為未來搵工返工都保持「最佳狀態」。
內地職場文化一向講究「體面」，冇工返等於冇面比，於是呢啲公司就應運而生，畀你用好低嘅成本買到一份「上班嘅尊嚴」。有網民話，呢啲地方好似「心理健身室」，幫你喺失業嘅低谷搵番少少渣拿。但係點解年輕人情願花錢扮返工，都唔願意喺屋企躺平？
內地熱潮背後嘅真相
呢股「扮返工」熱潮，唔單止係經濟問題，仲同內地獨有嘅職場文化同社會期望有關。內地年輕人面對「996」文化（朝九晚九、每周六日工）嘅壓力，同時又要應付父母期望與同輩競爭。失業或者做自由工作者，喺傳統觀念入面，多少比人覺得有啲「唔長進」。就係因為經濟低迷同社會壓力，呢啲模擬辦公室變成一個「避風港」，畀你喺多方期望之下仲可以平衡到心理健康。
有啲假裝上班公司甚至仲提供「職業輔導」同「模擬面試」，幫你練好職場技能，等你第日見工返工都唔會雞手鴨腳。價格方面，平均每日都只係30至50蚊人民幣，對於唔少失業青年嚟講，負擔得起之餘仲比去咖啡店平。記者同內地朋友傾過，佢哋話呢啲地方最吸引嘅係「氣氛」，有同事嘅感覺，有規律嘅作息，仲有種「我仲喺職場奮鬥緊」嘅感覺。呢啲心理需求，會唔會同樣喺香港年輕人所想嘅係同一樣嘅野？
香港情況又點？
香港會唔會有類似嘅「假裝上班公司」出現？表面睇，香港嘅職場文化同內地唔同，但壓力絕對唔會少。香港青年失業率雖然冇內地咁誇張，但2024年數據顯示，15至24歲嘅失業率一度達到10%以上，經濟放緩裁員減薪，行業競爭加劇，令好多畢業生搵工難上加難。加上香港生活成本高企，唔少人要同屋企人一齊住，失業或者freelance嘅狀態更加容易畀人「問長問短」。
不過，香港人嘅應對方式同內地有啲唔同。喺香港，年輕人會選擇去咖啡店、圖書館甚至共享工作空間打躉，仲未有「假裝上班公司」出現。點解？可能因為香港嘅共享工作空間（co-working space）已經好普及，租金雖然貴過內地，但對於freelancer或者想搵地方「hea」嘅人嚟講已經夠用，畀錢去「扮返工」香港人可能會覺得有啲攪笑。
話雖如此，內地呢股熱潮嘅核心——心理壓力同職場期望，喺香港同樣存在。尤其係疫情後，WFM同混合工作模式改變咗好多職場規則，唔少人開始懷念返工嘅儀式感。你有冇試過喺屋企Zoom開會，下身著睡衣上身著西裝？呢種「真的假不了」嘅工作狀態，會唔會令香港人開始渴望一個有規律嘅「上班環境」？
香港已經受衝擊？
雖然香港未有「假裝上班公司」，但類似嘅現象其實已經悄悄出現。記者觀察到，近年愈來愈多香港年輕人喺社交平台分享「偽返工日常」，例如喺咖啡店影一張電腦螢幕嘅相，配上「忙碌嘅一日」嘅caption，實際上可能只係喺度改CV或者hea住上網。呢啲行為同內地嘅「假裝上班」有異曲同工之妙，都係想透過外在環境同行為，畀自己或者外界一個「我好忙」嘅錯覺。
更有趣嘅係，香港嘅共享工作空間近年開始針對freelancer同失業人士推出更靈活嘅計劃，例如按小時計費嘅 hot desk 服務，吸引唔少人喺度「扮返工」。有網民話，喺呢啲地方工作，唔單止有專業感，仲可以同其他freelancer交流，畀自己一個「仲喺職場打滾」嘅信心。呢啲現象，本質上其實同內地嘅「假裝上班」無乜分別。
全世界一齊扮返工
放眼全球，類似嘅現象其實唔係內地獨有。日本早年有「網吧難民」，一班失業人士住喺網吧維持生活規律；美國同歐洲亦有愈來愈多人用共享工作空間當「心理避風港」。呢啲現象嘅共通點係：經濟壓力同職場期望嘅落差，逼使年輕人用各種方法「模擬正常生活」。喺內地，呢種模擬聚焦喺「上班感」；喺香港，可能更傾向喺社交媒體上展示「我好充實」嘅假象。
點解呢啲現象會喺呢個年代冒出嚟？經濟不景氣係一個原因，但更深層次嘅，係現代職場文化同社交媒體放大咗「成功」同「忙碌」嘅定義。唔忙等於唔上進，冇工等於失敗，呢種觀念喺全世界都好普遍。內地嘅「假裝上班公司」不過係將呢種心理需求變成一盤生意，香港會唔會有朝一日出現類似嘅商業模式？記者覺得，答案可能取決於香港年輕人點樣定義「職場尊嚴」。
未來會點走
「扮返工」文化會唔會喺香港落地生根？短期內，香港嘅高昂租金同務實文化可能會限制呢類公司嘅發展。始終，喺香港租個工作位置動輒幾百蚊一日，遠超內地嘅30至50蚊，吸引力未必夠。但長遠嚟講，如果經濟持續低迷，失業率再攀升，呢類服務可能會以新形式出現，例如與共享工作空間結合，或者透過線上平台提供「虛擬上班體驗」，又或者將個工作位置劏開，一個位兩個人用都未定。
更重要嘅係，呢股熱潮提醒我哋，職場文化同心理健康嘅關係愈來愈緊密。無論係內地定香港，年輕人都需要一個出口，去應對經濟壓力同社會期望。內地嘅「假裝上班公司」可能只係一個開始，未來會唔會有更多創新嘅「心理服務」出現？例如虛擬職場，或者AI教你點樣應付你老闆？
「扮返工」係奇怪現象定係社會新常態？香港會唔會遲早出現類似嘅服務？呢個現象不禁令人感慨，年輕人點樣喺壓力下搵到自己嘅出路，真係一個值得深思嘅題，攪得唔好嘅話，分分鐘變成呢一整代嘅問題。你又有咩睇法？有冇比扮返工更賺人熱淚嘅工作方式？立即上 nestalk.club 註冊成為會員加入討論，或者喺我哋新增設既討論區，話唔定你嘅一個絕核概念，可以點燃下一個職場革命！