食唔飽原來有益身心！你有冇試過食完一餐豐富嘅晚飯之後，個肚脹到好似你老豆有身紀咁款，仲要同朋友喺街邊吹水，飯氣攻心之餘腦袋一片迷霧，攪到連一句完整句子都講唔出。點解會有咁情況？近年D健康專欄越嚟越多提到「唔好食咁飽」，話食太飽會影響腦力、情緒，同判斷力。呢句話聽落好似吹水唔抹咀，但背後到底有冇科學根據？今次我哋就同你科學Ｄ咁睇吓，點解「食得飽」會咁大獲！
食飽點解會出現「腦霧」？
食完飯想瞓覺，係人都係咁，尤其是我哋龍的傳人，瞓晏覺甚至乎係我哋嘅傳統嚟！當你食完一盒堆到好似座山咁高嘅兩餸飯之後，會唔會覺得腦海開始一片空白，好似一舊雲咁？放心，呢個現象唔係得你一個係咁。消化系統喺你食飽後會搶走大量血液同氧氣，幫你分解胃入面嗰堆垃圾。結果呢？大腦得唔到足夠養份，個人自然變得恰吓恰吓，仲可能會出現「人生好迷茫」嘅失落感覺。
食太飽仲可能影響你嘅短期記憶同專注力。有研究話，長期過量進食會增加腦部炎症嘅風險，影響認知功能。換句話講，食得太飽唔單止即刻變「懵」，長遠嚟講可能仲會轉數都變慢，即係懵再加鈍，即懵懵鈍鈍。呢個發現即係話比我哋知：食飯唔係愈多愈好！
點解現代人咁易食過量？
你有冇試過去食自助餐，呢樣想試吓嗰樣又想試吓，結果拎咗三四碟返埋位？現代人好易食過量，原因真係要多得好似自助餐呢類咁文明嘅飲食文化。大都市式嘅生活，只要你唔係窮到開巷，基本上食物幾近唾手可得，超市同外賣平台24小時隨傳隨到，仲有超大份量嘅經濟套餐。另外，壓力大嘅生活方式亦係幫兇。唔少人喺工作壓力下，會用食野嚟「減壓」，結果一唔留神就食咗成包家庭裝薯片再加兩罐可樂。
現代飲食文化就好似一個陷阱咁，電視廣告總係鼓勵你「食多啲，開心啲」，唔會同你講「食多啲，死快啲」。開心真係咁簡單？話你知，食得太多，消化系統負荷過重，連帶情緒都可能變低落。試問，點樣喺一餐飯之後仲可以保持清醒，仲有心情同朋友吹水，甚至做啲有益有建設性嘅事？答案好簡單，就係食少啲，俾你嘅消化系統休息多啲，人自然清醒啲。
食飽同情緒嘅連繫
食飽係會影響你嘅心情。有冇試過食完一餐大魚大肉，覺得好滿足，但過咗一陣就開始後悔，甚至有啲罪疚感？呢種情緒波動唔關你事，而係你嘅身體同你講：我負荷唔到啦大佬！過量進食會引發血糖急升急跌，呢啲波動會直接影響你情緒嘅穩定性。
有啲人仲會喺食飽之後覺得渾身無力、無聊，甚至有啲沮喪嘅情況出現，直頭係周星馳喺家有囍事入面嗰隻無定向喪心病狂間歇性全身機能失調症。點解？因為你嘅身體正將所有資源投放到消化系統，連帶你嘅「快樂荷爾蒙」如血清素同多巴胺都可能受到影響。相反，適量飲食，特別係食啲高纖維、低糖嘅食物，不單止會幫你保持情緒穩定，仲可以提升專注力同創造力，分分鐘考試仲一百分添。下次想食多件蛋糕之前，先問吓自己，係咪真係好肚餓先？
唔好食飽嘅文化根源
「唔好食咁飽，唔係搵嚟攪」呢句話，聽落好似惡攪智慧名言，但其實唔少文化同哲學都有類似觀點。喺日本有「八分飽」，提倡食到八成飽就算，咁樣可以延年益壽。西方近年嘅斷食熱潮，亦間接鼓勵大家唔好食到太飽，畀胃同腦袋有空間「抖氣」。
點解呢啲古老智慧到今日仍然有用？因為人類嘅身體同腦袋，始終未完全適應現代嘅高熱量飲食環境。以前嘅人，食一餐可能要等幾個鐘甚至幾日先至有得食第二餐，而家我哋隨時隨地都可以食到飽，甚至飽完再食。結果，唔少人嘅身體同腦袋都畀呢種「過剩」文化拖垮。
點樣避免「食到懵」？
既然食太飽有咁多壞處，點樣可以避免？首先，試吓每餐食小D，食慢D，畀你嘅腦袋有時間同胃部「溝通」。一般嚟講，胃部需要大約20分鐘先會同大腦講「我夠飽啦」。所以，食慢D係一個好習慣。其次，選擇高纖維、低GI（血糖指數）嘅食物，例如蔬菜、全穀類同瘦肉，可以幫你保持血糖穩定，減少進食後出現嘅「腦霧」。
定時定量進食，避免餓到半死先食。因為當你太餓時，會好容易食過量，結果又陷入「食到懵」嘅惡性循環。唔少人試過用「八分飽」嘅方法，結果唔單止精神好咗，連工作效率同創意都提升咗。餐聽老闆見你又靚仔又靚女分分鐘仲可以八折埋單！
食飽做決定不如食飽瞓覺好過
有冇試過喺食飽之後做決定，結果後悔莫及？例如食完一餐勁嘅，衝動買咗件貴到離譜嘅衫，或者答應咗一個自己根本無心機做嘅項目？呢啲情況並唔係你嘅性格有問題，而係你嘅大腦喺食飽後變得「唔清醒」。血糖波動同消化負荷會影響你嘅判斷力，甚至令你變得衝動。
相反，適量飲食可以幫你保持冷靜同理性。如果你要同老闆傾野，或者同朋友討論人生大計，點樣可以畀自己精神進入最佳狀態？答案係：唔好食太飽，腦筋會更清晰醒。
「唔好食咁飽，唔係搵嚟攪」唔單止係一句生活名言，仲係一個提醒：你嘅飲食習慣，可能正悄悄影響你嘅人生。喺呢個節奏越嚟越快嘅世界，食飽好似係一個簡單嘅滿足，但長遠嚟講，適量飲食先係幫你保持腦力、情緒同掌握人生方向嘅關鍵。你試吓餐餐食到飽之後獲獲都做錯決定？試多幾次包你飯都食唔落！
你有冇試過食太飽之後瀨晒野？又或者餐餐食唔飽好想死嘅感覺？食飽無野做立即上 nestalk.club 註冊成為會員加入討論，或者喺我哋新增設既討論區分享你嘅經驗！